BAKI,VOA, Nailə Babazadə

İstanbul Respublika Baş Prokurorluğu tərəfindən aparılan korrupsiya və rüşvət araşdırması çərçivəsində Antalya Böyükşəhər Bələdiyyəsinə qarşı növbəti əməliyyat keçirilib.

VOA xəbər verir ki, İstanbul Qaçaqmalçılıq və Mütəşəkkil Cinayətkarlıqla Mübarizə Şöbəsinin əməkdaşları gecə saatlarında həyata keçirdikləri basqın zamanı bələdiyyə sədri Muhittin Böcəyin baş müşaviri Cem Oğuz və bələdiyyə əməkdaşı Buse K.-nı evlərində saxlayıblar.

İstintaq çərçivəsində şübhəlilərə qarşı "cinayətkar dəstə rəhbəri və üzvü olmaq", "rüşvət", "vəzifə səlahiyyətlərindən sui-istifadə", "tender fırıldaqçılığı" və "şəxsi məlumatların qanunsuz ələ keçirilməsi" kimi ağır ittihamlar irəli sürülüb. Saxlanılan şəxslərin ifadə vermək üçün İstanbula aparılacağı bildirilir.

Qeyd edək ki, bu iş üzrə əvvəllər də bir neçə mühüm şəxs həbs edilib. Bələdiyyə sədrinin sürücüləri Aydın G. və Özer U., həmçinin martın 29-da Xüsusi Katiblik bölməsinin əməkdaşı Yasin Y. məhkəmə qərarı ilə Silivri həbsxanasına göndəriliblər. Hazırda istintaqın miqyası genişlənməkdə davam edir.