BAKI,AzerVoice,Fərid Mikayılov
Türkiyədə idman sahəsində FETÖ ilə bağlı aparılan istintaq çərçivəsində Türkiyə Futbol Federasiyası (TFF) rəhbərliyində vaxtilə yüksək vəzifələrdə çalışmış bir sıra şəxslər ifadəyə çağırılıb.
AzerVoice xəbər verir ki, İstanbul Cumhuriyyət Baş Prokurorluğunun Terror Cinayətləri üzrə İstintaq Bürosu tərəfindən aparılan araşdırma çərçivəsində sabiq TFF sədr müavini, keçmiş basketbolçu Lütfi Arıboğan, TFF-nin keçmiş baş katibi Ebru Köksal, Türkiyə Milli Olimpiya Komitəsinin prezidenti Ahmet Gülüm və hüquqşünas İlhan Helvacı ifadə vermək üçün hüquq-mühafizə orqanlarına dəvət olunub.
Baş Prokurorluğun yaydığı rəsmi məlumatda bildirilib ki, ictimaiyyətdə “2011-ci il futbol istintaqı” kimi tanınan və Aziz Yıldırım başda olmaqla bir çox idman xadimini hədəf alan proseslərin FETÖ/PDY üzvləri tərəfindən qanunsuz şəkildə aparıldığı müəyyən edilib.
Açıqlamada adıçəkilən şəxslərin, FETÖ üzvü olduğu bildirilən jurnalist Mehmet Baransu ilə əlaqədə olaraq:
- istintaqın məxfiliyini pozmaqda,
- terror təşkilatına yardım etməkdə
- şübhəli bilindikləri qeyd olunub.
Bu səbəbdən onların ifadələrinin alınması üçün İstanbul Polis İdarəsinə göstəriş verildiyi bildirilib.