BAKI,VOA, Nailə Babazadə

İstanbul mərkəzli olmaqla 13 vilayətdə qanunsuz mərc oyunları təşkil edən şəbəkəyə qarşı keçirilən əməliyyat nəticəsində 24 şübhəli saxlanılıb. İstintaq materiallarına görə, saxlanılan şəxslər 2023-2025-ci illər ərzində qanunsuz mərc saytları vasitəsilə 1 milyard 200 milyon türk lirəsi (təxminən 62 milyon manat) məbləğində haqsız qazanc əldə ediblər.

VOA xəbər verir ki, İstanbul Respublika Baş Prokurorluğu tərəfindən aparılan təhqiqat çərçivəsində məlum olub ki, şəbəkə üzvləri əvvəlcə "www.showbahis.com", daha sonra isə "www.hızlıbahis.com" saytları vasitəsilə qanunsuz fəaliyyətlərini davam etdiriblər. Müvafiq rəqəmsal materialların və MASAK (Maliyyə Cinayətlərini Araşdırma Kurulu) hesabatlarının təhlili cinayətkar qrupun dövriyyəsini tam çılpaqlığı ilə ortaya qoyub.

Jandarma qüvvələrinin Kiber Cinayətkarlıqla Mübarizə Şöbəsi tərəfindən İstanbul, Adana, İzmir, Qaziantep, Antalya və digər 8 vilayətdə müəyyən edilmiş ünvanlara eyni vaxtda basqınlar edilib. Hazırda saxlanılan 24 nəfərin İstanbul İl Jandarma Komandanlığında dindirilməsi və digər hüquqi prosedurları davam edir.