BAKI,VOA, Nailə Babazadə

Türkiyənin Nəqliyyat və İnfrastruktur naziri Abdulkadir Uraloğlu Qara dənizdə xam neft daşıyan tankerin vurulması ilə bağlı mühüm detalları açıqlayıb.

VOA xəbər verir ki, nazir qeyd edib ki, Rusiyadan neft yükləyən və xarici bayraq altında üzən gəminin operatorları türklərdir.

"PUA deyil, pilotsuz dəniz aparatı ilə vurulduğunu düşünürük" - deyə Uraloğlu qeyd edib.

Uraloğlu gəminin məhz sıradan çıxarılması üçün hədəf alındığını bildirib:

"Gecə yarısından sonra gəminin maşın bölməsində partlayış baş verib. Biz bunun havadan dronla deyil, məhz pilotsuz dəniz aparatı (İDA) vasitəsilə həyata keçirildiyini düşünürük. Partlayışın xarici təsir nəticəsində baş verdiyi dəqiqdir və gəmini tamamilə dövriyyədən çıxarmaq məqsədi daşıyır."

Nazir gəmidəki 27 nəfərlik türk heyətinin səhhətində heç bir problemin olmadığını və yaralananların tapılmadığını təsdiqləyib. O, gəminin quru yük deyil, məhz xam neft daşıdığı üçün riskin daha yüksək olduğunu vurğulayıb. Hazırda Türkiyənin Sahil Mühafizə və Fövqəladə Hallar mərkəzinin texniki qrupları hadisə yerində araşdırmalar aparır. Yaxın saatlarda partlayışın səbəbi ilə bağlı daha dəqiq rəsmi məlumatın veriləcəyi gözlənilir.