BAKI, VOA, Orxan Qədirzadə

Kanadanın xarici işlər naziri Anita Anand yaxın günlərdə Türkiyəyə səfər edərək xarici işlər naziri Hakan Fidanla Yaxın Şərqdə vəziyyəti və gərginliyin azaldılması yollarını müzakirə edəcəyini açıqlayıb.

VOA xəbər verir ki, Anand mətbuat konfransında bildirib ki, səfər zamanı əsas diqqət regiondakı Kanada vətəndaşlarının ehtiyaclarına, mülki şəxslərin və mülki infrastrukturun qorunmasına, həmçinin eskalasiyanın qarşısının alınmasına yönələcək.

Kanadalı nazirin bəyanatı Ottavanın Livan üçün yeni humanitar yardım paketini açıqladığı gün səslənib. Kanada hökumətinin məlumatına görə, Livanda təcili humanitar ehtiyacların qarşılanması üçün 37,7 milyon Kanada dolları həcmində maliyyə yardımı ayrılıb. Bu vəsait sığınacaq, ərzaq, təmiz su və tibbi ləvazimatların təminatına yönəldiləcək.

Kanadanın beynəlxalq inkişaf üzrə dövlət katibi Randeep Sarai bildirib ki, yardım Kanada qeyri-hökumət təşkilatları, BMT qurumları və Qırmızı Xaç daxil olmaqla etibarlı humanitar tərəfdaşlar vasitəsilə çatdırılacaq. Ottawa bütün tərəfləri vəziyyəti dərhal sabitləşdirməyə və daha böyük humanitar fəlakətin qarşısını almaq üçün konstruktiv dialoqa çağırıb.

Bu səfər planı, Anitanın son günlər Türkiyə tərəfi ilə artıq təmaslar apardığını göstərən açıqlamalar fonunda diqqət çəkir. Kanada xarici siyasət qurumunun paylaşımına görə, Anand və Hakan Fidan Yaxın Şərqdə vəziyyətlə bağlı fikir mübadiləsi aparıblar.

Anandın Türkiyəyə səfəri, Ankaranın son günlər həm İran, həm də digər regional aktorlarla intensiv diplomatik əlaqələr qurduğu bir mərhələyə təsadüf edir. Reuters-in məlumatına görə, Türkiyə xarici işlər naziri Hakan Fidan martın 10-da iranlı həmkarı ilə danışığında bölgədə mülki şəxsləri riskə atan addımların qəbuledilməz olduğunu vurğulayıb. Bu da Ankaranın regiondakı vasitəçi və sabitləşdirici rolunu ön plana çıxarır.