BAKI,VOA, Orxan Qədirzadə
ABŞ və İran arasında İsveçrədə davam edən danışıqlar fonunda tərəflər arasında söz savaşı daha da sərtləşib. İran parlamentinin sədri Məhəmməd Baqir Qalibaf ABŞ Prezidenti Donald Trampın Tehrana yönəltdiyi son təhdidlərə cavab verərək, ölkəsinin təzyiqlər qarşısında geri çəkilməyəcəyini bildirib.
Qalibaf çıxışında ABŞ rəhbərliyinin İran əleyhinə bəyanatlarını kəskin tənqid edib və Vaşinqtonun təhdid siyasətinin nəticəsiz qaldığını vurğulayıb.
“Əgər onların təhdidləri nəticə versəydi, bu gün düşdükləri çıxılmaz vəziyyətlə üzləşməzdilər. Biz ABŞ-nin təhdidlərini ciddi qəbul etmirik. Onlar bəyanatlarına diqqət etməlidirlər. Silahlı qüvvələrimiz istənilən formada cavab verməyə hazırdır. Nə qədər danışsalar da, hərəkətə keçən tərəf biz olacağıq”, – deyə İran parlamentinin sədri bildirib.
Qalibafın açıqlaması ABŞ Prezidenti Donald Trampın Hörmüz boğazı ilə bağlı səsləndirdiyi sərt bəyanatlardan sonra verilib. Tramp daha əvvəl İran rəsmiləri ilə apardığı danışıqlara toxunaraq bildirmişdi ki, əgər Tehran Hörmüz boğazını bağlamağa cəhd etsə, bunun İran üçün çox ağır nəticələri olacaq.
ABŞ Prezidenti qeyd etmişdi ki, İran boğazı bağlayacağı təqdirdə “ölkə olaraq mövcudluğunu belə təhlükə altına sala bilər” və İran rəhbərliyinə belə addımdan çəkinmək barədə xəbərdarlıq etdiyini vurğulamışdı.
Bu arada İran və ABŞ nümayəndələri arasında İsveçrənin Bürgenştok şəhərində Pakistan və Qətərin vasitəçiliyi ilə keçirilən danışıqlarda fasilə elan olunub.
İranın yarırəsmi informasiya vasitələrinin yaydığı məlumata görə, fasilənin məqsədi tərəflərin öz paytaxtları ilə məsləhətləşmələr aparması və müzakirələrin gedişi ilə bağlı əlavə təlimatlar almasıdır.
İran Xarici İşlər Nazirliyinin və danışıqlar heyətinin sözçüsü İsmayıl Bəqayi bildirib ki, fasilədən sonra görüşlər yenidən davam etdiriləcək. Onun sözlərinə görə, tərəflər arasında aparılan müzakirələrin gün ərzində yekunlaşacağı gözlənilir.
Hələlik danışıqların nəticələri barədə rəsmi məlumat açıqlanmasa da, müşahidəçilər hesab edirlər ki, Hörmüz boğazının statusu, İranın nüvə proqramı, regional təhlükəsizlik məsələləri və sanksiyalar mövzusu danışıqların əsas gündəliyini təşkil edir.
Regionda artan gərginlik fonunda Vaşinqton və Tehran arasında aparılan təmasların nəticəsi Yaxın Şərqin təhlükəsizlik arxitekturası və qlobal enerji bazarları baxımından xüsusi əhəmiyyət daşıyır.