BAKI, VOA, Orxan Qədirzadə
MHP sədri Devlet Bahçeli ABŞ və İsrailin İrana qarşı addımlarını sərt tənqid edib, Türkiyənin bütün ssenarilərə hazır olmalı olduğunu bildirib.
VOA xəbər verir ki, MHP sədri Devlet Bahçeli partiyanın iftar proqramında çıxışı zamanı ABŞ və İsrailin İrana qarşı siyasətinin bölgədə təhlükəli nəticələr doğurduğunu deyib. Onun sözlərinə görə, müharibənin regional xarakter alması, etnik və məzhəb zəminində daha geniş qarşıdurmaya çevrilməsi üçün təxribatlar aparılır.
Bahçeli bildirib ki, Ankara prosesləri diqqətlə izləyir, Türkiyə heç bir təhdid qarşısında geri çəkilməyəcək və milli təhlükəsizliyini qorumaq üçün strateji tarazlığı saxlayacaq. O, həmçinin ABŞ-İsrail xəttinin İran qarşısında gözlədiyi nəticəni ala bilmədiyini deyib.
MHP lideri çıxışında Yaxın Şərqdə gərginliyin daha da böyüməsinin qarşısının alınmasını istəyib, atəşkəsin vacibliyini vurğulayıb və ABŞ ilə İsrailin İrandan “əl çəkməli” olduğunu bildirib. Onun fikrincə, problemin yeganə çıxış yolu dialoq və diplomatiyadır.
Bahçeli eyni çıxışda Türkiyə daxilində “Terrorsuz Türkiyə” hədəfinin güzəşt deyil, milli birliyin möhkəmləndirilməsi olduğunu da deyib. O, partiyasına yönələn hücumlara cavab olaraq “Şeytan oradadırsa, iman buradadır, haydı hodri meydan” ifadəsini işlədib.