BAKI, VOA, Orxan Qədirzadə
Türkiyənin Xarici İşlər naziri Hakan Fidan TRT Haber-in xüsusi buraxılışında bölgədəki son hərbi gərginlik və İran-İsrail-ABŞ qarşıdurması ilə bağlı mühüm açıqlamalar verib.
VOA xəbər verir ki, nazir İranın "mən batsam, bölgəni də özümlə apararam" strategiyasının həm Tehranın özü, həm də region üçün ağır nəticələr doğuracağını vurğulayıb.
Hakan Fidan xüsusilə Körfəz ölkələrinin müharibənin qarşısını almaq üçün göstərdiyi səylərə diqqət çəkib: "Qətər, Küveyt, Oman və digər ölkələr bu müharibənin çıxmaması üçün böyük fədakarlıq etdilər. Lakin İranın heç bir fərq qoymadan vasitəçilik edən bu ölkələri bombalaması çox yanlışdır. İran özü hücuma məruz qaldıqca, dünya iqtisadiyyatı üçün kritik olan enerji infrastrukturuna zərbə vuraraq təzyiq rıçağı yaratmağa çalışır".
Nazir həmçinin ABŞ və İsrailin İranla bağlı iki fərqli ssenari (hərbi potensialın məhv edilməsi və ya rejim dəyişikliyi) üzərində dayandığını, Türkiyənin isə vəziyyətin daha da pisləşməməsi üçün intensiv diplomatiya apardığını qeyd edib. O, yanvar ayında prezident Ərdoğanla Donald Tramp arasında keçirilən tarixi telefon danışığının müharibənin bir müddət gecikməsində rol oynadığını da ilk dəfə açıqlayıb.