BAKI, AzerVoice, Nailə Babazadə
Türkiyənin daxili işlər naziri Ali Yerlikaya sosial media hesabından verdiyi rəsmi açıqlamada MLKP terror təşkilatına qarşı keçirilən genişmiqyaslı əməliyyatlar barədə məlumat paylaşıb. İstanbul Respublika Baş Prokurorluğu və İstanbul Polis İdarəsinin koordinasiyası ilə Terrorla Mübarizə və Kəşfiyyat şöbə müdirliyi tərəfindən həyata keçirilən tədbirlər çərçivəsində, silahlı terror təşkilatının mətbuat və gənclər qanadları vasitəsilə fəaliyyət göstərən şəxslər müəyyən edilərək hədəf alınıb.
AzerVoice xəbər verir ki, İstanbul mərkəzli olmaqla Antalya, Adıyaman, Şanlıurfa, Rize, Bursa, Van, Tekirdağ, Qaziantep, Samsun, Tunceli, Malatya, Diyarbakır, Kocaeli, Yalova, Balıkesir, Denizli, Ankara, İzmir, Sakarya, Adana və Mersində eyni vaxtda təşkil edilən əməliyyatlar nəticəsində ümumilikdə 96 şübhəli şəxs saxlanılıb.
Aparılan araşdırmalar zamanı məlum olub ki, saxlanılan şəxslər təşkilatın gənclər, həmçinin mətbuat və təbliğat strukturları daxilində aktiv fəaliyyət göstəriblər. Şübhəlilərin təşkilatın yüksək rütbəli rəhbərlərinin də iştirak etdiyi onlayn iclaslar vasitəsilə mütəmadi olaraq təlimatlar aldıqları müəyyən edilib. Bundan əlavə, həmin şəxslərin terror təşkilatının yaradılmasının 30-cu ildönümü tədbirlərinə, təşkilati göstərişlər əsasında keçirilən qondarma anım fəaliyyətlərinə və müxtəlif qeyri-qanuni təşkilatlara qatıldıqları, habelə sosial media üzərindən terror təbliğatını ehtiva edən paylaşımlar etdikləri faktlarla sübuta yetirilib. Faktla bağlı genişmiqyaslı istintaq hərəkətlərinə başlanılıb.
Nazir Ali Yerlikaya açıqlamasında terrorla mübarizənin qətiyyətlə davam etdirildiyini vurğulayaraq, bu mübarizənin yalnız sahədəki əməliyyatlarla bitmədiyini qeyd edib. O bildirib ki, terrorla mübarizə təhlükəsizlik, kəşfiyyat, kommunikasiya və beynəlxalq əməkdaşlığı əhatə edən çoxşaxəli bir strategiyaya söykənir. Nazir ölkənin hər bir bölgəsində hüzur və sabitliyin qorunması üçün fəaliyyətlərin davam edəcəyini qeyd edərək, bu uğurlu əməliyyatda əməyi keçən prokurorluq əməkdaşlarını və qəhrəman polis heyətini təbrik edib.