BAKI, AzerVoice, Nailə Babazadə

Əvvəl terrorsuz Türkiyə, sonra terrorsuz bölgə.

AzerVoice xəbər verir ki, Prezident Rəcəb Tayyib Ərdoğan, Atatürk Havalimanı Millet Bahçəsinin açılışında çıxış edərək ölkədə təhlükəsizliyin və sülhün vacibliyini vurğulayıb.

Ərdoğan bildirib ki, “Milətimizin ödədiyi qurbanlar boşa getməyib. Biz yalnız sərhədlərimiz daxilində deyil, sərhədlərimizin kənarında da barışın, təhlükəsizliyin və sülhün hökm sürdüyü yeni bir dövrü mütləq başladaq. Bunda sonuna qədər qərarlıyıq. Əvvəl terrorsuz Türkiyə, sonra terrorsuz bölgə.”

Prezident çıxışında şəhərlərin ruhundan, insanların təhlükəsizliyindən və sülhün şəhərlərin inkişafında əsas amil olduğundan da danışıb. Bildirib ki, ölkə və şəhərlər insanın təhlükəsizliyi təmin olunmadan tam inkişaf edə bilməz.

Ərdoğan həmçinin ölkədə həyata keçirilən terrorla mübarizə tədbirləri və təhlükəsizlik strategiyaları sayəsində ciddi irəliləyiş əldə olunduğunu qeyd edib: “Münfesih terror təşkilatı silahlı qüvvələrini Türkiyədən çıxarmaq və sərhədlərdən uzaqlaşdırmaq qərarına gəlib. Bu, gələcək mərhələlər üçün mühüm bir addımdır.”

Prezident vurğulayıb ki, dövlət və ictimai qurumlar təhlükəsizlik və əmin-amanlığın təmin olunması üçün çalışır və xalqı birliyə çağırıb: “Bir olacağıq, birlikdə olacağıq, iri və diri olacağıq. Hər birimiz Türkiyəyik.”