BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan Körfəz turunun ilk dayanacağı olan Küveytə səfər edib və rəsmi mərasimlə qarşılanıb.
AzerVoice xəbər verir ki, prezidentlə birlikdə Birinci xanım Əminə Ərdoğan, xarici işlər naziri Hakan Fidan, enerji və təbii sərvətlər naziri Alparslan Bayraktar, xəzinə və maliyyə naziri Mehmet Şimşek, milli müdafiə naziri Yaşar Güler, sənaye və texnologiya naziri Mehmet Fatih Kacır, ticarət naziri Ömər Bolat, eləcə də AK Partiya rəhbərliyindən bir sıra yüksək vəzifəli şəxslər - Ömər Çelik, Halit Yerebakan, Özlem Zengin, MİT rəhbəri İbrahim Kalın, Prezident Administrasiyasının Kommunikasiya rəhbəri Burhanettin Duran, Müdafiə Sənayesi Komitəsinin sədri Haluk Görgün və xarici siyasət və təhlükəsizlik üzrə baş müşavir Akif Çağatay Kılıç da Küveytə səfərdə iştirak ediblər.
Rəsmi qarşılama mərasimindən sonra Prezident Ərdoğan Küveyt əmiri Şeyx Məşəl əl-Əhməd əl-Cabir əs-Sabah ilə ikili və nümayəndə heyətləri səviyyəsində görüşlər keçirib. Görüş zamanı ikitərəfli münasibətlər və regional əməkdaşlıq məsələləri müzakirə olunub.
Prezident Ərdoğanın Körfəz turunun ikinci dayanacağı sabah Qətər olacaq. Ərdoğan paytaxt Dohada Qətər əmiri Şeyx Təmim bin Həməd əs-Tani ilə görüşəcək.
Görüşdə ikitərəfli əlaqələr, regional məsələlər, Qəzzədə atəşkəs prosesi və bölgənin yenidən qurulması əsas müzakirə mövzuları olacaq.
