BAKI, AzerVoice, Fərid Mikayılov

Baykar İdarə Heyətinin sədri Selçuk Bayraktar, İstanbul Atatürk Hava Limanında keçirilən TEKNOFEST 2025 sərgisində çıxış edərək, festivalın sadəcə bir texnologiya sərgisi deyil, Milli Texnologiya Hərəkatının simvolu olduğunu bildirib.

AzerVoice xəbər verir ki, Bayraktar çıxışında vurğulayıb ki, TEKNOFEST əsrlərdir davam edən “öyrənilmiş çarəsizliyə” bir etirazdır və gənc nəsillərin texnologiya yarışlarında istehlakçı yox, istehsalçı kimi səhnəyə çıxmasının göstəricisidir.

Onun sözlərinə görə, bu il 13-ü yeni olmaqla 64 yarışma təşkil olunub və festivala 1 milyon 100 min gənc qatılıb.

Festivalda ilk dəfə TEKNOFEST Çempionlar Yürüşü keçirilib, 100-dən çox texnologiya məhsulu nümayiş etdirilib. “Çelik Kubbe” hava hücumundan müdafiə sistemi, “Fetih 1453” rəqəmsal tarix layihəsi və Onkologiyada 3T Yarışması, Türkcə Böyük Dil Modeli Yarışması kimi yeni təşəbbüslər təqdim olunub.

Bayraktar həmçinin milli sosial media platforması NSosyal və süni intellekt dəstəyi ilə hazırlanan Kürə Rəqəmsal Ensiklopediyasını elan edərək, bu layihələrin qlobal rəqəmsal hegemoniyaya alternativ olduğunu vurğulayıb.

Çıxışında dünyadakı ədalətsizliklərə də toxunan Bayraktar, Qəzzada baş verən hadisələri “müasir çağın ən amansız soyqırımı” adlandırıb və insanlığa qarşı bu cinayətlərin dayandırılması üçün milli texnologiya hərəkatının həm hərbi, həm də mənəvi güc yaratmaq məqsədi daşıdığını qeyd edib.

Bayraktar çıxışını gənclərə müraciətlə tamamlayaraq, onların xəyallarını göylə məhdudlaşdırmamalarını, daha uzağı hədəfləmələrini istəyib.

“Tam müstəqil və firavan Türkiyə idealini birlikdə inşa edəcəyik. Gələcək bizimdir, gələcək TEKNOFEST nəslinindir, gələcək Türkiyənindir”- deyə o sonda qeyd edib.