BAKI, AzerVoice, Fərid Mikayılov

Braziliya Konqresi 10 sentyabr 2025-ci ildə rəsmi qəzet DOU vasitəsilə Türkiyə ilə müdafiə sənayesi sahəsində əməkdaşlıq sazişini təsdiqləyib.

AzerVoice xəbər verir ki, beş il müddətinə qüvvədə olacaq bu razılaşma tədqiqat və inkişaf, istehsal, modernizasiya, həmçinin ortaq layihələrin üçüncü tərəflərə satışı kimi istiqamətləri əhatə edir.

Türkiyə ilə Braziliya arasında müdafiə sənayesi sahəsində əməkdaşlıq uzun müddətdir gündəmdədir. Hal-hazırda bir sıra Türk şirkətləri Braziliya hərbi proqramlarında nəzərdən keçirilir:

• Otokar şirkətinin TULPAR zirehli döyüş maşını Braziliyanın yeni IFV və atəş dəstəyi vasitəsi tenderində qısa siyahıya daxil edilib.
• Kale Jet Engines tərəfindən istehsal olunan KTJ-3200 turbojet mühərriki, MANSUP-ER gəmiəleyhinə raket proqramında potensial variantlardan biri kimi dəyərləndirilir.
• Canik şirkəti M2 QCB ağır pulemyotu ilə Braziliya Ordusunun tenderində qalib gələnlərdən olub.
• Braziliyanın PUA ehtiyaclarının ödənilməsi üçün Bayraktar TB2 kimi Türk modelləri nəzərdən keçirilir.

Yeni saziş Türkiyə müdafiə sənayesi şirkətlərinə Braziliya bazarında daha geniş imkanlar və ortaq istehsal perspektivləri açacaq. Braziliya isə texnologiya transferi və istehsal infrastrukturunun inkişafı baxımından əlavə üstünlüklər əldə etməyi planlaşdırır.