BAKI, AzerVoice, Fərid Mikayılov

Balıkesirin Sındırğı rayonunda ardıcıl zəlzələlərin baş verməsindən sonra tanınmış geoloq, professor Naci Görür sosial şəbəkə üzərindən sərt açıqlama ilə çıxış edib.

AzerVoice xəbər verir ki, o, bəzi mütəxəssislərin açıqlamalarını tənqid edərək, Türkiyədə hələ də zəlzələyə davamlı şəhərlərin qurulmamasını kəskin şəkildə qınayıb.

Sındırğıda 4,8 bal gücündə əsas təkanın ardından 4,2 və 4,3 bal gücündə iki zəlzələ də qeydə alınıb. Zəlzələlər Bursa və ətraf bölgələrdə hiss edilsə də, ciddi dağıntı və ya itki qeydə alınmayıb.

Professor Okan Tüysüz açıqlamasında bu təkanların adi artçılardan çox “zəlzələ fırtınası”nı xatırlatdığını bildirib. Digər geoloq Şener Üşümezsoy isə Simav fay zonasının uzunmüddətli böyük zəlzələ potensialı daşıdığını qeyd edib.

Naci Görür bəzi mütəxəssislərin vəziyyəti “normal” kimi qiymətləndirməsini tənqid edib.

“Bir neçə gün öncə Kamçatkada 8,8 bal gücündə zəlzələ oldu, nə ölən oldu, nə də ev dağıldı. Bizdə olsaydı, on minlərlə insan həyatını itirərdi. Çünki hələ də zəlzələyə davamlı şəhərlər salınmayıb”- deyə o bildirib.

Geoloq vurğulayıb ki, Türkiyə təbii fəlakət risklərinə qarşı dərhal addımlar atmalı, zəlzələyə davamlı şəhərlərin qurulması milli təhlükəsizlik məsələsi kimi gündəmə gətirilməlidir.