BAKI,VOA,Yusif Şərifzadə

İtaliya futbolunun əfsanəvi simalarından Paolo Maldini və keçmiş braziliyalı futbolçu Leonardo İtaliya Futbol Federasiyasındakı (FIGC) vəzifələrindən istefa veriblər. Bu barədə Sky Sport Italia məlumat yayıb.

VOA xəbər verir ki, Paolo Maldini və Leonardo cəmi bir neçə gün əvvəl İtaliya milli komandasında aparılan genişmiqyaslı islahatlar çərçivəsində federasiyada vəzifə tutmağa razılıq vermişdilər. Maldini iyulun 11-də milli komandanın yenidən qurulmasına rəhbərlik etmək məqsədilə FIGC-nin texniki direktoru təyin olunmuşdu.

İtaliya yığmasının ardıcıl üçüncü dəfə dünya çempionatına vəsiqə qazana bilməməsindən sonra komandada ciddi struktur dəyişiklikləri həyata keçirilirdi. Lakin Maldini təyinatından cəmi 16 gün sonra istefa verib. Onunla birlikdə müşaviri və keçmiş Braziliya millisinin üzvü Leonardo da vəzifəsindən ayrılıb.

İstefalar, həmçinin İtaliya millisinin baş məşqçi postuna namizəd göstərilən Andrea Pirlonun namizədliyini geri götürdüyünü açıqlamasından qısa müddət sonra baş verib.

Məlumata görə, Pirlonun mümkün təyinatı Rusiyaya məxsus mərc şirkəti ilə kommersiya əlaqələrinə görə ciddi tənqidlərlə qarşılaşmışdı. Maldini və Leonardonun istefasının səbəbləri ilə bağlı isə rəsmi açıqlama verilməyib.