BAKI, AzerVoice, Nərmin Ağayeva
Türkiyə Böyük Millət Məclisində (TBMM) Terrordan Azad Türkiyə Komissiyasının üçüncü iclası keçirilib.
AzerVoice xəbər verir ki, TBMM sədri Numan Kurtulmuş iclasda çıxış edərək AK Partiya, CHP və DEM Partiyasının hər birindən əlavə bir üzvün adlarının təqdim olunmasını istəyib.
O, komissiyanın işini səmimiyyətlə qəbul etdiyini, gündəliyə nəzarət etdiyini və qərarlarını ardıcıl şəkildə həyata keçirdiyini vurğulayıb. Kurtulmuş milli birliyi və qardaşlığı möhkəmləndirmək üçün geniş təmsilçiliyin vacibliyinə diqqət çəkib və bu məqsədlə 51 nəfərlik komissiyanın yaradıldığını xatırladıb. İYİ Partiyanın isə üzv təqdim etməyəcəyini rəsmi olaraq bildirdiyini qeyd edib. Bugünkü iclasda əsas gündəliyin komissiyanın işinə dair üzvlərin təkliflərini dinləmək olduğu bildirilib.
Qeyd edək ki, Terrordan Azad Türkiyə Komissiyası 25 iyul 2025-ci ildə formalaşdırılıb və altı siyasi partiya qrupunu, həmçinin qrupsuz altı siyasi partiyanı əhatə edir.