BAKI, AzerVoice, Səməd Əyyubov – Türkiyə Xarici İşlər Nazirliyi, israilli nazirlərin Əl-Əqsa məscidinə təşkil etdiyi basqını qınayıb.
AzerVoice xəbər verir ki, bu barədə nazirliyin yaydığı bəyanatda deyilir.
“Bəzi israilli nazirlərin İsrail polisi müşayiəti və israilli qruplarla birlikdə bu gün Əl-Əqsa məscidinə təşkil etdikləri basqını sərt şəkildə qınayırıq” - deyə, bəyanatda qeyd olunub.
Bəyanatda, Əl-Əqsa məscidinin təhlükəsizliyinin və Qüdsün müqəddəs kimliyinin qorunmasının yalnız regional deyil, bəşəriyyətin ortaq vicdanı naminə prioritet məsuliyyət olduğu vurğulanıb.
“İşğalçı İsrailin bu sistematik təxribatları və son dövrlərdəki ilhaq çağırışları iki dövlətli həllin əsaslarını hədəf alır və sülh ümidlərinə ciddi zərbə vurur” - deyə, bəyanatda bildirilib.
İsrailin regionda sabitliyi pozan fəaliyyətləri qarşısında təcili atəşkəsin təmin olunması və iki dövlətli həll əsasında davamlı sülhün yaradılmasına dair çağırış edilib.
Qeyd edək ki, İsrailin ifrat sağçı milli təhlükəsizlik naziri İtamar Ben-Qvir bu səhər yenidən Məsçidül-Əqsaya basqın edib. O, bir çox ərəb və İslam ölkəsinin sərt reaksiyasına baxmayaraq Əl-Əqsa həyətlərinə basqınlarını davam etdirir. Belə yüksək səviyyəli israilli rəsmilərin Əl-Əqsaya etdiyi basqınlar adətən İsrail Baş naziri Binyamin Netanyahunun ofisindən əvvəlcədən razılaşdırılır.
Ben-Qvir 2022-ci ilin sonunda İsrailin Milli Təhlükəsizlik naziri təyin edildiyi vaxtdan bəri Əl-Əqsaya dəfələrlə basqınlar təşkil edib.
1994-cü ildə İsraillə imzalanan Vadi Araba Sazişinə əsasən, İordaniya Qüdsdəki dini işlərə cavabdeh ölkə kimi tanınır. Sazişin 9-cu maddəsində İsrailin, İordaniya Haşimilər Krallığının Qüdsdəki mövcud statusuna hörmət etməli olduğu xüsusi qeyd olunur.
Bu razılaşmaya əsasən, Əl-Əqsa məscidi İordaniyanın Vəqflər, İslam İşləri və Müqəddəs Məbədlər Nazirliyinə bağlı Qüds İslam Vəqfləri İdarəsinin nəzarətindədir. Lakin 2003-cü ildən etibarən yəhudi qruplar bu idarənin icazəsi olmadan, İsrailin birtərəfli qərarı və polis müşayiəti ilə məscidə daxil olmağa başlayıblar. Mövcud status-kvoya əsasən, fanatik yəhudilərin Əl-Əqsa məscidində ibadət etməsinə icazə verilməməlidir, lakin onlar tez-tez polis qoruması altında oraya daxil olaraq bu qaydanı pozurlar.