BAKI, AzerVoice

Türkiyənin Ədliyyə naziri Yılmaz Tunç, bəzi media orqanlarında yayılan 700 PKK üzvünün azadlığa buraxılacağı iddialarını qəti şəkildə təkzib edib.

AzerVoice xəbər verir ki, nazir bu iddiaların əsassız və ictimaiyyəti çaşdırmağa yönəlmiş məlumatlar olduğunu bildirib.

Tunç qeyd edib ki, bu rəqəmlər həqiqəti əks etdirmir və müəyyən qəzetlərin manşetlərə daşıdığı bu cür xəbərlər hüquqi reallıqlara əsaslanmır.

O, terror təşkilatlarının silah buraxması ilə bağlı yayılan digər xəbərlərə də toxunaraq, bunun hər hansı siyasi və ya hüquqi bazarlığın nəticəsi olmadığını vurğulayıb.

“Dövlət heç bir zaman terrorçularla masa arxasında oturmaz. Dövlətin əsas prinsipi hüququn üstünlüyüdür və bu mövzularda yalnız qanunlar işləyər”- deyə nazir bildirib.

Yılmaz Tunç həmçinin qeyd edib ki, PKK ilə əlaqələndirilən Veysi Aktaşın azadlığa çıxması, qanuni müddətin tamamlanması ilə bağlıdır və bu məsələ ilə bağlı hər hansı yeni hüquqi dəyişiklik həyata keçirilməyib.

Nazir əlavə edib ki, ağır xəstə məhkumlarla bağlı son illərdə qanunvericilikdə dəyişikliklər edilib və müəyyən şərtlərlə onların evdə cəza çəkməsi mümkün olub.