BAKI, AzerVoice
DEM Partiyası nümayəndə heyəti, PKK terror təşkilatının həbsdə olan lideri Abdullah Öcalan ilə görüşmək məqsədilə İmralı Adasına səfər edib.
AzerVoice xəbər verir ki, səfərdə partiyanın Van millət vəkili Pervin Buldan, Şanlıurfa millət vəkili Mithat Sancar və hüquqşünas Özgür Erol iştirak edir.
Heyətin İmralı səfəri, PKK-ya bağlı bir qrupun silahlarını yerə qoyduğunu açıqlamasının ardından başlayan siyasi dialoq və “terrorla mübarizədə siyasi yol xəritəsi” çərçivəsində həyata keçirilir.
DEM Partiyası nümayəndə heyəti bu prosesin bir hissəsi olaraq daha əvvəl Milliyyətçi Hərəkat Partiyasının (MHP) sədri Devlet Bahçeli və Cümhuriyyət Xalq Partiyasının (CHP) sədri Özgür Özəl ilə də görüşlər keçirib. Görüşlərdə əsas mövzulardan biri Türkiyə Böyük Millət Məclisi (TBMM) çərçivəsində terrorla mübarizəyə dair komissiyanın yaradılması olub.
Heyətin həmçinin Ədliyyə naziri Yılmaz Tunç ilə də görüş keçirdiyi, bu təmaslarda İmralı prosesi və siyasi dialoqun hüquqi çərçivələri ətrafında fikir mübadiləsi aparıldığı bildirilir.
Məlumata görə, heyət son günlərdə keçirilən siyasi və institusional görüşlərə dair məlumatları Abdullah Öcalanla paylaşmaq və prosesin növbəti mərhələləri barədə onunla məsləhətləşmək niyyətindədir. İmralı görüşünün nə zaman baş tutacağına dair rəsmi məlumat verilməsə də, prosesin gedişi baxımından bu səfər siyasi və ictimai baxımdan əhəmiyyətli bir mərhələ kimi qiymətləndirilir.
Qeyd edək ki, iyulun 11-də İraqın Süleymaniyyə şəhərində PKK-ya bağlı bir qrup silahlarını məhv edərək prosesin yeni mərhələsini başladıb.
PKK üzvləri Süleymaniyyənin Surdaş mahalı sərhədindəki mağarada toplaşaraq silahlarını alovlu qazanda məhv ediblər. Proses İraq Kürd Regional Rəhbərliyi, Türkiyənin Milli Kəşfiyyat Təşkilatı, DEM Partiyası nümayəndələri və vətəndaş cəmiyyəti təmsilçilərinin iştirakı ilə izlənilib.
MHP sədri Devlet Bahçelinin çağırışı və Prezident Rəcəb Tayyib Ərdoğanın dəstəyi ilə irəliləyən "Terrorsuz Türkiyə" prosesi, silahların məhv edilməsi ilə simvolik dönüş nöqtəsinə çatıb. PKK-nın tam tərksilahı sentyabrın sonuna qədər tamamlanması planlaşdırılır.
Həmçinin qeyd edək ki, bu prosesin əsas mərhələlərinə DEM Partiyasının Ədliyyə Nazirliyinin icazəsi ilə İmralıya səfərləri, siyasi partiyalar arasında müzakirələr və prezident Ərdoğanın Pervin Buldan və Mithat Sancarla görüşləri daxildir. PKK mayın 5-7-də keçirilən qurultayında təşkilatın ləğvi və silahın yerə qoyulması qərarını açıqlamışdı.
"Terrordan Azad Türkiyə" hədəfinin həyata keçməsi ilə ölkə əhalisi üçün yeni bir dövr başlayır. Hökumət, prosesi sülh və təhlükəsizlik çərçivəsində davam etdirməkdə qərarlıdır.