BAKI, AzerVoice
Aslan Özdemir məhkəməyə göndərildi – “Leman” jurnalının istintaqı genişlənir.
AzerVoicexəbər verir ki, “Leman” jurnalının baş redaktoru Aslan Özdemir İstanbul hava limanında saxlanıldıqdan sonra ifadəsi alınıb və həbs tələbi ilə Sülh Cəza Məhkəməsinə göndərilib.
İstanbul Respublika Prokurorluğunun 26 iyun 2025-ci il tarixli sayda dərc olunan və dini dəyərləri təhqir etdiyi iddia edilən karikatura ilə bağlı başladığı istintaq davam edir. İstintaq çərçivəsində jurnalın rəhbəri Əli Yavuz, dizayner Cebrail Okçu və karikatura müəllifi Doğan Pehlevan daha əvvəl həbs olunmuşdu.
Əməliyyatlar zamanı ölkə xaricində olduğu müəyyənləşdirilən baş redaktor Aslan Özdemir Türk Hava Yollarının Marsel-İstanbul reysi ilə Türkiyəyə qayıdarkən hava limanında saxlanılıb.
Polis bölməsindəki prosedurlardan sonra ədliyyəyə gətirilən Özdemir, ifadə verdikdən sonra həbs tələbi ilə Sülh Cəza Məhkəməsinə sövq edilib.
Qeyd edək ki, “Leman” jurnalının yayımladığı karikatura Türkiyə ictimaiyyətində və rəsmi dairələrdə ciddi narazılıqla qarşılanıb, istintaqın gedişində yeni həbslərin ola biləcəyi istisna edilmir.