BAKI, AzerVoice

Türkiyə Prezidenti Rəcəb Tayyib Ərdoğan İstanbulda keçirilən İslam Əməkdaşlıq Təşkilatının (İƏT) Gənclər Forumunun “Böyük Gənclik Mükafatı” mərasimində çıxış edərək, Fələstin məsələsi və Qəzzada baş verənlərlə bağlı sərt mövqe sərgiləyib.

AzerVoice xəbər verir ki, Ərdoğan çıxışında İsrailin Qəzzada törətdiyi cinayətləri insanlıq adına qara ləkə adlandırıb və beynəlxalq ictimaiyyəti susqunluğuna görə tənqid edib.

“Soyqırımın iştirakçıları yalnız onu həyata keçirənlər deyil, həm də buna susanlardır” – deyə dövlət başçısı bildirib.

Ərdoğan vurğulayıb ki, İsrailin hazırkı rəhbərliyi, xüsusilə Baş nazir Benyamin Netanyahu və onun ətrafı gələcəkdə insanlıq tarixində utanc nümunəsi kimi qeyd olunacaq.

“Bütün dünya bilməlidir ki, biz zalımin qarşısında əyilmirik. Biz Fələstinli qardaşlarımızın haqqını müdafiə etməyə davam edəcəyik. Bu, siyasi məsələ deyil – bu, insanlıq və vicdan borcudur”- deyə o vuröulayıb.

Türkiyə lideri İslam ölkələri arasında həmrəylik və təşkilatlanmanın vacibliyini vurğulayıb. Onun sözlərinə görə, İslam dünyası həm maddi, həm də mənəvi baxımdan böyük gücə malikdir, lakin bu potensial birliyin və koordinasiyanın zəifliyi səbəbilə istifadə edilmir.

Ərdoğan çıxışında Qəzzaa baş verən insanlıq faciəsinin beynəlxalq ictimaiyyəti silkələməli olduğunu bildirib və İslam dünyasının gənclərini biganə qalmamağa çağırıb.

Tədbirdə bir çox İƏT ölkələrinin gənclər nümayəndələri, rəhbər şəxslər və beynəlxalq qonaqlar iştirak edib.