Səudiyyə Ərəbistanının Yəməndə mina və partlayıcı qurğuların təmizlənməsi üzrə “Masam” layihəsi çərçivəsində ötən həftə ölkənin müxtəlif bölgələrində 1 836 partlayıcı vasitə zərərsizləşdirilib.

Məlumata görə, təmizlənən qurğuların 1 792-si partlamamış sursat, 25-i tank əleyhinə mina, 13-ü piyada əleyhinə mina, 6-sı isə kustar üsulla hazırlanmış partlayıcı qurğu olub.

Partlayıcı vasitələrin yaşayış məntəqələri, yollar və digər ərazilərdə nizamsız şəkildə yerləşdirilməsi mülki əhali, xüsusilə uşaqlar, qadınlar və yaşlılar üçün ciddi təhlükə yaradır.

Mina təmizləmə işləri Mə’rib, Ədən, Əl-Cövf, Şəbva, Taiz, Hudeydə, Ləhic, Səna, Əl-Beyda, Əd-Dali və Səəda vilayətlərində aparılıb.

Bu əməliyyatlarla “Masam” layihəsinin 2018-ci ildə başladılmasından bəri Yəməndə zərərsizləşdirilən partlayıcı qurğuların ümumi sayı 587 506-ya çatıb.

Layihə çərçivəsində kəndlər, yollar və məktəblər minalardan təmizlənir. Məqsəd mülki şəxslərin təhlükəsiz hərəkətini təmin etmək və humanitar yardımların bölgələrə çatdırılmasını asanlaşdırmaqdır.

Səudiyyə yardım agentliyi “KSrelief” tərəfindən həyata keçirilən layihə yerli mina təmizləmə mütəxəssislərinin hazırlanmasına, müasir avadanlıqlarla təmin edilməsinə və partlayıcı qurğulardan yaralanan Yəmən vətəndaşlarına dəstək göstərilməsinə də xidmət edir.