BAKI, AzerVoice

İran-İsrail arasında şiddətlənən münaqişənin qarşısını almaq məqsədilə Türkiyə prezidenti Rəcəb Tayyib Ərdoğan bir sıra diplomatik təmaslar həyata keçirib.

AzerVoice xəbər verir ki, Ərdoğan ABŞ prezidenti Donald Trump, İran prezidenti Məsud Pezeşkian və Rusiya prezidenti Vladimir Putinlə telefon danışıqları aparıb, tərəfləri atəşkəsə çağırıb və Türkiyənin vasitəçi roluna hazır olduğunu vurğulayıb.

Prezident iyunun 13-də İsrailin İrana hücumundan sonra yaranan gərginliyin bütün regionu təhdid etdiyini bildirərək, münaqişənin dayandırılması üçün diplomatik kanallar vasitəsilə intensiv fəaliyyətə başlayıb. İyunun 14 və 15-də ABŞ prezidenti Tramp və İran lideri Pezeşkianla iki dəfə danışan Ərdoğan, həmçinin bölgədə sabitliyin bərpası üçün nüvə danışıqlarının bərpasının vacibliyini önə çəkib.

Dünən Rusiya prezidenti Vladimir Putinlə də telefon danışığı keçirən Ərdoğan bildirib ki, İsrailin İrana qarşı hücumları beynəlxalq hüququn açıq şəkildə pozulmasıdır və bu zorakılıq dalğası bölgənin yeni bir müharibəni qaldıra bilməyəcəyini göstərir. Prezident Putin də görüşdə Ərdoğanın mövqeyini dəstəkləyərək, münaqişənin diplomatik yolla həllinin vacibliyini vurğulayıb.

Qeyd edək ki, Prezident Ərdoğan son günlərdə Misir, Səudiyyə Ərəbistanı, Pakistan, İordaniya, Oman və Suriya da daxil olmaqla bir sıra ölkə liderləri ilə də telefon danışıqları aparıb. Bu təmaslar Ankara diplomatiyasının regional sabitlik üçün fəal rol oynadığını göstərir.