BAKI, AzerVoice

Simavda 1,5 ayda 1250-yə yaxın yeraltı təkan qeydə alınıb.

AzerVoice xəbər verir ki, Kütahya Dumlupınar Universitetinin Geologiya Mühəndisliyi üzrə müəllimi Prof. Dr. Müzəffər Özburan Simav rayonunda bu ilin əvvəlindən bəri 1350-ə yaxın zəlzələnin qeydə alındığını, bunlardan təxminən 1250-nin son 1,5 ay ərzində baş verdiyini bildirib.

Özburan qeyd edib ki, aprelin 21-də baş verən 4,3 bal gücündə zəlzələ ilə başlayan seysmik fəallıq hələ də davam edir. Son olaraq, iyunun 10-da Simavda qeydə alınan 4,5 bal gücündə zəlzələ ətraf rayonlarda da hiss olunub.

Onun sözlərinə görə, apreldən bu yana 4 baldan yuxarı 8 zəlzələ qeydə alınıb və bu təkanların bəziləri 4,6 bala qədər yüksəlib. Lakin bu təkanlarda klassik zəlzələ ardıcıllığındakı kimi zəifləmə müşahidə olunmur.

Zəlzələlərin Simav Fayı, Emet-Gediz Fayı və Naşa Fay Zonasının kəsişdiyi ərazidə baş verdiyini bildirən professor bu vəziyyəti “zəlzələ fırtınası” kimi qiymətləndirib. O qeyd edib ki, bu proses geotermal mənşəli ola bilər və yaxın dövrdə də seysmik aktivliyin davam etməsi mümkündür.