BAKI, AzerVoice

Türk Qızıl Aypara Cəmiyyəti qurban ətlərini yalnız bayram günlərində deyil, il boyunca ehtiyacı olan insanlara çatdırmağı hədəfləyir.

AzerVoice xəbər verir ki, Qurban Bayramı münasibətilə həyata keçirilən kampaniya çərçivəsində Türk Qızıl Ayparası 2025-ci ildə konservləşdirilmiş qurban ətləri vasitəsilə milyonlarla insana dəstək göstərməyi planlaşdırır.

Türk Qızıl Ayparası Başçı Köməkçisi Mustafa Sarıla bildirib ki, hazırda Türk Qızıl Ayparası ölkə daxilində gündəlik olaraq 44 mindən çox ehtiyac sahibinə isti yemək paylayır.

O, bu ilki vəkalət haqlarının ölkə daxilində 13.250 lirə, xaricdə isə 5.250 lirə olaraq müəyyən edildiyini bildirib. Qəzza və Fələstin üçün ayrılan qurban vəkalətinin də 13.250 lirə olduğunu qeyd edib.

“Qurban vermək yalnız dini və fərdi məsuliyyət deyil, eyni zamanda sosial həmrəylik və humanitar dəyər daşıyır,” – deyə Sarılar əlavə edib. O bildirib ki, Türk Qızıl Ayparası 22 ölkədə qurban kəsimlərini həyata keçirir və bu proses tam şəffaflıqla, baytar nəzarəti altında və İslam qaydalarına uyğun şəkildə aparılır.

Mustafa Sarılar əlavə edib ki, 2023-cü ildə 106 min, 2024-cü ildə isə 146 min qurban etibarnaməsi qəbul edilib. Bu sayədə 2023-cü ildə 2 milyon 600 min, 2024-cü ildə isə 4 milyon 640 min nəfər ehtiyac sahibi yardımla təmin olunub.

Türk Qızıl Aypara Cəmiyyətinin bu ilki əsas məqsədi daha çox insanın həyatına toxunmaq və yardım əhatəsini genişləndirməkdir. Sarılar ictimaiyyəti ianə etməyə və bu humanitar səylərə dəstək olmağa çağırıb.

Qeyd edək ki, Türk Qızıl Ayparası yalnız fövqəladə hallarda deyil, ilboyu sosial dəstək fəaliyyətləri ilə cəmiyyətin ən zəif təbəqələrini əhatə edir və davamlı humanitar yardım strategiyası ilə ölkə daxilində və xaricdə minlərlə insana ümid olur.