BAKI, AzerVoice
"Terrorsuz Türkiyə məsələsi Türkiyənin yaşaması məsələsidir"
AzerVoice xəbər verir ki, Türkiyə
Böyük Millət Məclisinin (TBMM) sədri Numan Kurtulmuş "Terrorsuz
Türkiyə" mövzusunun siyasi bir cazibə və ya layihə olmadığını,
bunun Türkiyənin yaşaması ilə əlaqəli bir məsələ olduğunu
bildirib.
Kurtulmuş, bu məqsədlə atılacaq addımların ölkənin gələcəyi üçün
olduqca vacib olduğunu vurğulayıb. O, həmçinin Qəzza məsələsi ilə
bağlı Türkiyənin beynəlxalq platformalarda sərt mövqe ortaya
qoyduğunu və BMT-nin bu məsələdə uğursuz olduğunu qeyd edib.
Kurtulmuş, Özbəkistanın paytaxtı Daşkənddə keçirilən Parlamentlərarası İttifaqın 150-ci Baş Assambleyasına qatıldığını, toplantının həm Özbəkistanın tanıtımına, həm də dünyanın müxtəlif qitələrindən 2000-ə yaxın parlament nümayəndəsinin iştirakı ilə çoxşaxəli parlament diplomatiyası üçün vacib bir platforma olduğunu qeyd edib. Görüşdə, Türkiyə və Özbəkistan arasında dostluğun daimi olması üçün parlamentlərin atacağı addımların müzakirə olunduğunu bildirib.
Qəzza ilə bağlı sualını cavablandıran Kurtulmuş, İsrailin beynəlxalq ictimaiyyət tərəfindən dayandırılması lazım olduğunu vurğulayıb. Qəzza məsələsinin yalnız fələstinlilərin, ərəblərin və ya müsəlmanların problemi olmadığını, bütün bəşəriyyətin ortaq bir problemi olduğunu bildirib.
O, Türkiyənin yeni bir dövrə daxil olduğunu və terrora son qoyulmasının Türkiyənin yaşaması ilə birbaşa əlaqəli olduğunu vurğulayıb. Silahların susdurulması və terror bəlasının tamamilə aradan qaldırılması məqsədini önə çəkən Kurtulmuş, bu məsələnin Türkiyənin gələcəyi və yeni nəsillər üçün böyük əhəmiyyət kəsb etdiyini qeyd edib.
Sonda, yeni dünya düzəni ilə bağlı suala cavab verərkən, Kurtulmuş, heç bir ölkənin təkbaşına dünyaya hakim ola bilməyəcəyini vurğulayıb. O, dünyanın müxtəlif güc mərkəzlərinin yaranmasından bəhs edərək, Türkiyənin bu mərkəzlərdən biri olaraq əhəmiyyətli bir rol oynayacağını bildirib. Yeni dövrdə Türkiyənin bu güc mərkəzlərindəki yerini möhkəmləndirəcəyini və inkişaflardan ən yaxşı şəkildə istifadə edəcəyini vurğulayıb.