BAKI, AzerVoice

“Biz Suriyada İsraillə qarşılaşmaq istəmirik”

AzerVoice xəbər verir ki, Türkiyənin xarici işlər naziri Hakan Fidan Brüsseldə NATO Xarici İşlər Nazirləri Toplantısında iştirak edib və beynəlxalq mətbuata açıqlamalar verib.

Nazir Fidan Suriyadakı vəziyyətlə bağlı mövqeyini ifadə edərək bildirib ki, Türkiyə Suriyada İsraillə qarşı-qarşıya gəlmək istəmir.

“Əgər Suriya rəhbərliyi İsraillə müəyyən razılığa gəlmək istəyirsə, bu onların işidir” - deyə o bildirib. Nazir, həmçinin İsrailin hücumlarının Suriyanın yeni hökumətinin İŞİD və digər təhlükələrə qarşı mübarizə aparmaq imkanlarını zəiflətməsindən narahatlıq ifadə edib.

ABŞ-İran münasibətlərinə də toxunan Fidan, regionda gərginliyin artmasının narahatlıq doğurduğunu qeyd edib. “ABŞ-İran gərginliyində diplomatiyaya ehtiyac var. İranın hücumunu görmək istəmirik” - deyə o qeyd edib.

Qeyd edək ki, NATO Xarici İşlər Nazirləri Toplantısı çərçivəsində Türkiyə tərəfi regional sabitlik və diplomatik həll yollarının əhəmiyyətini vurğulamağa davam edir.