Bakı,AzerVoice

Türkiyə Milli Müdafiə Nazirliyi (MSB) 40 ədəd Eurofighter Typhoon təyyarəsinin tədarükü üçün Böyük Britaniya Müdafiə Nazirliyindən və əlaqədar şirkətdən qiymət təklifinin yaxın günlərdə gələcəyini açıqlayıb.

AzerVoice xəbər verir ki , nazirlikdə keçirilən mətbuat konfransında jurnalistlərə verilən açıqlamada bildirilib ki, F-16 məsələsi ilə bağlı texniki müzakirələr də müsbət şəkildə davam edir.

Türkiyənin Hərbi Hava Qüvvələrinin ehtiyaclarını qarşılamaq üçün yerli və milli alternativlər inkişaf etdirilənə qədər F-16 və Eurofighter təyyarələrinin alınması prioritet olaraq qalır.

MSB rəsmilərinin açıqlamalarına əsasən,F-16 döyüş təyyarələrinin alınması ilə bağlı danışıqlar müsbət davam edir.

Eurofighter Typhoon tədarükü üçün Böyük Britaniya ilə sənədləşmə tamamlanıb və qiymət təklifi gözlənilir.

KAAN, HÜRJET, KIZILELMA və ANKA-3 kimi yerli istehsal layihələri tam istifadəyə verildikdən sonra isə, xarici döyüş təyyarələrinə ehtiyac azalacaq.

MSB mənbələri, Türkiyə nümayəndə heyətinin Suriyaya səfərinin əhəmiyyətini vurğulayaraq, Suriya ilə müdafiə və təhlükəsizlik sahəsində əməkdaşlığın qurulacağını bildiriblər. Görüşdə, xüsusilə həm Türkiyə, həm də Suriya üçün təhlükə yaradan terror təşkilatlarına qarşı birgə mübarizə məsələsi müzakirə edilib.

Nazirlik həmçinin Yüksək İntizam Şurası (YDK) tərəfindən leytenantlar və idarəçilərlə bağlı qərarların da bu gün təsdiq prosesindən sonra açıqlanacağını bildirib.