Bakı, AzerVoice

Türkiyə 338 min 161 beynəlxalq tələbəyə təhsil verərək, ali təhsil tutumunun 4,76 faizini təşkil edən kvota ilə dünyada beynəlxalq təhsil sahəsində ilk 10 ölkə arasında yer alıb.

AzerVoice xəbər verir ki, bu mesaj Türkiyənin Maarif Vəqfi tərəfindən təşkil edilən 4-cü İstanbul Təhsil Zirvəsində oxunub. Zirvə "Bərabər və Daha Ədalətli Cəmiyyət və Davamlı Gələcək üçün Təhsil" mövzusunda keçirilib və Anadolu Agentliyi qlobal rabitə tərəfdaşı kimi iştirak edib.

Türkiyə Prezidenti Rəcəb Tayyib Ərdoğan “Bu il Türkiyə universitetlərində 338 min 161 beynəlxalq tələbə təhsil alır. Bu göstərici ilə Türkiyə beynəlxalq təhsildə ilk 10-luğa daxil olub. Maarif Vəqfi dünyanın 55 ölkəsində 446 məktəb, 1 universitet, 19 təhsil mərkəzi, 11 Türkiyə Araşdırmaları Mərkəzi və 44 yataqxana ilə 50 mindən çox tələbəyə xidmət göstərir.” - deyə bildirib.

Türkiyə Maarif Vəqfi həm yerli kurikulumları, həm də beynəlxalq təhsil metodlarını tətbiq etməklə, fəzilətli və bacarıqlı nəsillərin yetişdirilməsinə töhfə verir. Vəqfin fəaliyyətləri həm icmalararası ünsiyyətin inkişafına, həm də təhsil sahəsinin zənginləşməsinə xidmət edir.

Prezident Ərdoğan vəqfə verdikləri dəstəyin davam edəcəyini bildirib.
“Dünyanın 55 fərqli ölkəsində, çətin şəraitdə çalışan və təhsil bayrağını fədakarlıqla dalğalandıran bütün Maarif Vəqfi əməkdaşlarını təbrik edirəm. Türkiyə təhsil sahəsində həm ölkə daxilində, həm də qlobal səviyyədə liderliyini qoruyur.” - deyə vurğulayıb.

Ərdoğan həmçinin zirvənin uğurlu olmasını arzulayıb və tədbiri təşkil edən Maarif Vəqfini təbrik edib.