BAKI,VOA, Fərid Mikayılov

Türkiyənin turizm potensialının tanıdılması məqsədilə Aşqabadda xüsusi tədbir təşkil olunub.

VOA xəbər verir ki, 14 aprel 2026-cı il tarixində Türkiyənin Aşqabad şəhərindəki səfirliyinin Mədəniyyət Mərkəzində Türkiyənin Turizm Həftəsinin açılış mərasimi keçirilib.

Məlumata əsasən, hər il 15–22 aprel tarixlərini əhatə edən bu həftə turizm sahəsinin iqtisadi, sosial və mədəni əhəmiyyətini artırmaq məqsədi daşıyır. Tədbir Türkiyənin səfirliyi, Mədəniyyət və Turizm Nazirliyi, eləcə də Turizmin Təşviqi və Tanıdılması Agentliyi tərəfindən təşkil olunub.

Qeyd olunub ki, mərasimdə xarici ölkələrin diplomatları, ictimaiyyət nümayəndələri və media təmsilçiləri iştirak ediblər. Tədbirdə Türkiyənin mədəniyyət və turizm nazirinin müavini Nadir Alparslan da iştirak edib.

Bildirilib ki, Türkiyənin Aşqabaddakı səfiri Ahmet Demirok çıxışında ölkəsinin coğrafi mövqeyi, zəngin tarixi-mədəni irsi və turizm imkanları ilə dünyanın aparıcı turizm istiqamətlərindən biri olduğunu vurğulayıb.

Məlumata görə, çıxış edənlər turizmin xalqlar arasında əlaqələrin möhkəmlənməsində mühüm rol oynadığını qeyd edib, Türkiyə ilə Türkmənistan arasında münasibətlərin dostluq və qardaşlıq prinsiplərinə əsaslandığını bildiriblər.

Qeyd edilib ki, tədbir çərçivəsində qonaqlara ənənəvi türk mətbəxinə aid müxtəlif təamlar təqdim olunub.