BAKI, AzerVoice , Fərid Mikayılov
Türkmənistan Prezidenti Serdar Berdiməhəmmədovun dəvəti ilə Özbəkistan Prezidenti Şavkat Mirziyoyev 4–5 avqust tarixlərində Türkmənistana işgüzar səfər edəcək.
AzerVoice xəbər verir ki, səfər çərçivəsində Mirziyoyev, “Avaza” milli turizm zonasında keçiriləcək BMT-nin Dənizə çıxışı olmayan inkişaf etməkdə olan dövlətlər üzrə üçüncü beynəlxalq konfransında iştirak edəcək.
Beynəlxalq tədbirə BMT-nin Baş katibi Antonio Quterreş, bir sıra ölkələrin dövlət və hökumət başçıları, beynəlxalq və regional təşkilatların rəhbərləri qatılacaq.
Forumda beynəlxalq əməkdaşlığın inkişafı, nəqliyyat əlaqələrinin möhkəmləndirilməsi, ticarət əməliyyatlarının sadələşdirilməsi, iqtisadi transformasiya, iqlim dəyişikliyi ilə mübarizə, ətraf mühitin mürəkkəb problemlərinə qarşı dayanıqlığın artırılması və Durnuxlu İnkişaf Məqsədlərinə nail olmaq istiqamətində əldə olunan irəliləyişlər müzakirə olunacaq.
Tədbirin yekununda Avaza Fəaliyyət Proqramının qəbul edilməsi nəzərdə tutulur.
Səfər zamanı Mirziyoyevin Mərkəzi Asiya dövlət başçılarının 7-ci Məsləhətçi görüşünə hazırlıqla bağlı iclasda iştirak edəcəyi və bir sıra ikitərəfli danışıqlar aparacağı gözlənilir.