BAKI,VOA,Yusif Şərifzadə

Claude süni intellekt modellərinin yaradıcısı Anthropic şirkəti Mariano-Florentino Kuelyarı (Mariano-Florentino Cuéllar) ilk qlobal məsələlər üzrə direktoru vəzifəsinə təyin edib.

VOA xəbər verir ki, Kuelyar şirkətin prezidenti Daniela Amodeiyə tabe olacaq və fəaliyyətini Anthropic-in San-Fransiskodakı baş qərargahında davam etdirəcək.

Onun əsas vəzifələri ABŞ hökuməti ilə əlaqələrin idarə olunması, eləcə də Anthropic-in fəaliyyət göstərdiyi və genişləndiyi ölkələrlə münasibətlərin koordinasiya edilməsi olacaq.

Şirkət bildirib ki, Kuelyarın təyinatı dövlət idarəçiliyi və süni intellekt sahəsində geniş təcrübəyə malik, müxtəlif tərəflər arasında konsensus yaratmaq bacarığı ilə seçilən şəxsə üstünlük verilməsi ilə bağlıdır.

Mariano-Florentino Kuelyar ABŞ-ın keçmiş prezidenti Barak Obamanın administrasiyasında xüsusi köməkçi vəzifəsində çalışıb. O, bu il Tramp administrasiyasının Anthropic-in bəzi süni intellekt texnologiyalarına tətbiq etdiyi məhdudiyyətlər və nəzarət tədbirləri fonunda şirkətlə ABŞ hökuməti arasında əməkdaşlığın inkişafına cavabdeh olacaq.

Kuelyar bu ilin yanvar ayından Anthropic-in ictimai maraqlara xidmət missiyasına nəzarət edən Uzunmüddətli Fayda Fondunun üzvü idi. Yeni vəzifəsi ilə əlaqədar həmin postdan ayrılacaq və fond onun yerinə yeni üzv seçəcək.