BAKI, AzerVoice, Fərid Mikayılov

Özbəkistan milli komandasının və İngiltərənin Mançester Siti klubunun müdafiəçisi Abdukodir Husanov 2025-ci ildə Asiyanın ən yaxşı gənc futbolçusu seçilib.

AzerVoice xəbər verir ki, mükafat nüfuzlu Goalpost nəşri tərəfindən keçirilən səsvermənin nəticələrinə əsasən təqdim olunub.

Məlumata görə, 21 yaşlı futbolçu üçün ötən il karyerasında dönüş nöqtəsi olub. O, yanvar ayında Mançester Siti klubuna transfer olunaraq İngiltərə Premyer Liqasında çıxış edən Özbəkistandan ilk futbolçu kimi tarixə düşüb.

İyun ayında isə Husanov Özbəkistan milli komandasının dünya çempionatına vəsiqə qazanmasında mühüm rol oynayıb. Cari mövsümdə o, Mançester təmsilçisinin heyətində doqquz oyunda meydana çıxıb və sabit çıxışı ilə diqqət çəkib.

Goalpost tərəfindən təşkil edilən səsvermədə Abdukodir Husanov Asiyanın müxtəlif ölkələrindən – Özbəkistan, Avstraliya, İndoneziya, Koreya Respublikası, İraq və digər dövlətlərdən olan perspektivli gənc futbolçuları geridə qoyub.

Bununla yanaşı, Husanov beynəlxalq nüfuzunun artdığını təsdiqləyən daha bir göstərici əldə edib. Belə ki, o, The Athletic nəşrinin tərtib etdiyi dünyanın ən güclü 100 futbolçusu siyahısında 86-cı pillədə qərarlaşıb.

Mütəxəssislər Abdukodir Husanovun həm klub, həm də milli səviyyədə yüksələn performansının yaxın illərdə onu Asiya futbolunun aparıcı simalarından birinə çevirə biləcəyini bildirirlər.