BAKI,VOA, Fərid Mikayılov

Çelsi rəhbərliyi baş məşqçi Liam Rosenior ilə əməkdaşlığa cəmi 104 gündən sonra son qoyub. Komandanın son nəticələri – ardıcıl beş məğlubiyyət və qol vurulmadan keçən oyunlar bu qərarın əsas səbəbi kimi göstərilir.

VOA xəbər verir ki, ilkin hesablamalara əsasən klubun Roseniorun uzunmüddətli müqaviləsinə görə təxminən 24 milyon funt sterlinq kompensasiya ödəməli olacağı gözlənilirdi.

Lakin müqavilədə nəzərdə tutulmuş xüsusi “break clause” (erkən ləğv maddəsi) sayəsində Çelsi bu böyük maliyyə yükündən yayınmağı bacarıb.

Qeyd olunur ki, Rosenior rəhbərlik etdiyi 23 oyunun 10-da məğlub olaraq klub tarixində qısa müddətdə ən çox uduzan məşqçilərdən biri olub. Son olaraq Brayton qarşısında 0:3 hesablı məğlubiyyət onun istefasını sürətləndirib.

Klub rəhbərliyi yeni baş məşqçi təyinatını yay aylarına qədər təxirə salıb. Bu müddətdə komandanı müvəqqəti olaraq Calum McFarlane çalışdıracaq.

Onun əsas vəzifəsi komandanın psixoloji durumunu bərpa etmək və mövsümün qalan hissəsində nəticələri yaxşılaşdırmaqdır.

Çelsini yaxın günlərdə İngiltərə Kubokunun yarımfinal mərhələsində Lids Yunayted ilə çətin qarşılaşma gözləyir. Kubok bu mövsüm klub üçün yeganə titul şansı kimi qiymətləndirilir.