BAKI,VOA, Fərid Mikayılov

“Mançester Yunayted” komandanın kapitanı Bruno Fernandeşin uzunmüddətli gələcəyini təmin etmək məqsədilə ona yeni və rekord məbləğli müqavilə təklif etməyə hazırlaşır.

VOA xəbər verir ki, İngiltərə klubu portuqaliyalı yarımmüdafiəçiyə həftəlik 375 min funt sterlinq maaş nəzərdə tutan yeni müqavilə təklif etməyi planlaşdırır.

Bununla da rəhbərlik futbolçuya maraq göstərən Səudiyyə Ərəbistanı klubları və digər potensial namizədlərin qarşısını almağı hədəfləyir.

Bildirilir ki, 31 yaşlı futbolçu “Old Trafford”u tərk etmək niyyətində deyil və karyerasını “Mançester Yunayted”də davam etdirməkdə maraqlıdır. Fernandeşin klubun gələcək layihəsinə inandığı və komandada əsas fiqur olaraq qalmaq istədiyi qeyd olunur.

Yeni müqavilə baş tutacağı təqdirdə futbolçunun hazırkı həftəlik 250 min funtluq maaşı təxminən 50 faiz artırılacaq. Sənəddə həmçinin komandanın daxili və beynəlxalq turnirlərdə uğurlarına görə əlavə bonusların da yer alacağı gözlənilir.

Hazırda Bruno Fernandeşin klubla müqaviləsi gələn ilin yayına qədər qüvvədədir. Müqavilədə əlavə bir il uzatma imkanı da mövcuddur. Klub rəhbərliyi yeni müqavilə ilə kapitanın karyerasının ən məhsuldar dövrünü “Mançester Yunayted”də keçirməsinə nail olacağına inanır.