BAKI,AzerVoice,Fərid Mikayılov

Mançester Yunaytedin səhmdarı Sir Cim Ratklif klubun zəif nəticələri fonunda baş məşqçi Ruben Amorimlə təcili görüş keçirib.

AzerVoice xəbər verir ki, Ratklif cümə axşamı helikopterlə Karrinqton bazasına gələrək Amorim və klub rəhbərliyinin digər nümayəndələri ilə danışıqlar aparıb.

Rəhbərliyin bu səfəri əvvəlcədən planlaşdırıldığı bildirilsə də, mövsümə uğursuz start əsas müzakirə mövzusu olub. Mançester Yunayted Premyer Liqada ilk dörd oyundan yalnız birində qalib gələrək hazırda 14-cü pillədə qərarlaşıb. Komanda, həmçinin, Karabao Kubokunda II Liqa təmsilçisi Qrimsbi Tauna məğlub olaraq yarışdan kənarlaşdırılıb.

Baş məşqçi Amorimin tətbiq etdiyi 3-4-3 sistemi futbolçular və azarkeşlər tərəfindən tənqid olunur. Xüsusilə komandanın kapitanı Bruno Fernandesin də taktiki quruluşdan narazı olduğu bildirilir. Buna baxmayaraq, Amorim geri çəkilmək niyyətində olmadığını bildirib.

Mançester Yunaytedin şənbə günü Old Trafford-da Çelsi ilə keçirəcəyi görüş Amorimin gələcəyi üçün “həlledici” matç sayılır. Qələbə mövcud gərginliyi azalda bilər, lakin məğlubiyyət Ratklifin baş məşqçi ilə bağlı qərarını sürətləndirə bilər.