BAKI,AzerVoice, Fərid Mikayılov

Mançester Sitinin norveçli hücumçusu Erlinq Haaland futbol tarixində yeni rekorda imza atıb.

AzerVoice xəbər verir ki, o, Çempionlar Liqasında 50 qol səddini cəmi 49 oyunda keçərək bu uğura ən sürətli çatan oyunçu olub.

Haaland, Sitinin Napoli üzərində 2:0 hesabı ilə qazandığı qələbədə hesabı açan qolu vurmaqla bu nailiyyəti rəsmiləşdirib.

Əvvəlki rekord hollandiyalı Ruud van Nistelrooya məxsus idi. O, Mançester Yunayted və Real Madrid formalarında 62 oyunda 50 qola çatmışdı. Haaland isə bu rekordu 13 oyun daha az müddətdə qıraraq futbol tarixində adını yazdırdı.

Haaland Çempionlar Liqasına 2019-cu ildə Red Bull Salzburg forması ilə möhtəşəm debüt edərək ilk matçında Genkə qarşı ilk hissədə het-trik etmişdi. Ardınca turnirdə ilk 5 oyununda qol sevinci yaşayan yeganə futbolçu oldu. Dortmund və daha sonra Sitidə də eyni sürəti qoruyaraq, indi tarixi rekorda imza atdı.

Onun 50 qolunun 34-ü sol ayaqla, 11-i sağ ayaqla, 5-i isə başla vurulub. Haaland ən çox qollarını Sevilya və Leypsiqin qapısına (hərəyə 6 qol) vurub. Xüsusilə 2023-cü ilin 1/8 final mərhələsinin cavab oyununda Leypsiqə qarşı 5 dəfə fərqlənmişdi.