BAKI,AzerVoice, Fərid Mikayılov

Braziliyalı cinah futbolçusu Antoni Mançester Yunayteddəki uğursuz dönəminə son qoyur.

AzerVoice xəbər verir ki, İngiltərə nəhəngi, keçmiş icarə futbolçusunun Real Betisə 25 milyon avro müqabilində birdəfəlik transferi ilə razılığa gəlib.

Antoni 2022-ci ilin yayında Ayaksdan 85 milyon funt sterlinq qarşılığında Mançester Yunaytedə gətirilmişdi. Lakin o, Premyer Liqa təmsilçisində gözlənilən oyunu göstərə bilmədi, 96 oyunda cəmi 12 qol vurdu.

Ötən mövsümün ikinci yarısını icarə əsasında Betisdə keçirən Antoni, burada 26 oyunda 9 qol və 5 məhsuldar ötürmə ilə parlayıb. İspaniyada futbolçunun özünə inamı və oyuna həvəsi geri qayıdıb.

Tərəflər 25 yaşlı oyunçunun birdəfəlik keçidi üçün anlaşma əldə ediblər. Müqavilədə əlavə olaraq 3 milyon avro bonus bəndi də nəzərdə tutulub. Mançester Yunayted isə oyunçuya qoyduğu sərmayənin böyük hissəsini itirsə də, müqaviləyə 50 faiz gələcək satışdan pay maddəsi əlavə edib.

Antoni Old Traffordda daha iki illik müqaviləyə sahib idi, lakin o, yüksək maaşından imtina edərək özünü daha rahat hiss etdiyi Betisə qayıtmağı seçdi.