BAKI, AzerVoice, Nailə Babazadə
Galatasaray 2025–2026 mövsümünə hazırlıq çərçivəsində İtaliyanın Lazio klubu ilə yoldaşlıq oyununda qarşılaşacaq. Görüş 2 avqust axşamı saat 22:00-da İstanbulda, RAMS Park stadionunda keçiriləcək.
AzerVoice xəbər verir ki, Sarı-qırmızılılar son olaraq 2021-ci ildə UEFA Avropa Liqasında qarşılaşdığı Lazio ilə bu dəfə hazırlıq oyunu çərçivəsində üz-üzə gələcək. Komandalar arasında o dövrdə keçirilən görüşlərdə Galatasaray İstanbulda 1:0 qalib gəlmiş, Romadakı matç isə qolsuz bərabərliklə başa çatmışdı.
Galatasaray hazırlıqlarda uğurlu seriya qurub
Yeni mövsümə hazırlıq məqsədilə Galatasaray daha əvvəl Ümraniyespor (5:2), Admira Wacker (2:1), Cagliari (3:1) və Strasbourg (3:1) klublarını məğlub edərək uğurlu nəticələr əldə edib.
Sane və Osimhen üçün imza mərasimi keçiriləcək
Lazio ilə oyundan öncə Galatasaray bu yay transfer etdiyi ulduz futbolçular Leroy Sane və Victor Osimhen üçün rəsmi imza mərasimi keçirəcək. Alman ulduz Sane Bayern Münchendən, nigeriyalı hücumçu Osimhen isə iyulun 31-də transferi açıqlanaraq komandaya cəlb olunub.
Tarixi transfer: Lorik Cana – Fernando Muslera dəyişməsi
Galatasaray 2011-ci ildə tarixində iz qoyan qapıçısı Fernando Musleranı Lazio klubundan 6.75 milyon avro və Lorik Cana əvəzində transfer etmişdi. Muslera Galatasaray formasını 550 dəfə geyinərək 8 Super Liqa, 5 Türkiyə Kuboku və 6 TFF Superkuboku qazanaraq klub tarixinin ən çox kubok qazanan futbolçusu olmuşdur.
Muslera həm də Galatasaray tarixində ən çox liqa matçında çıxış edən və Super Liqada ən çox forma geyinən legioner statusuna sahibdir.
Şükrü Gülesin və Can Bartu ilə Lazio xatirələri
Türk futbolunun önəmli adlarından Şükrü Gülesin 1951–1952 mövsümündə Beşiktaşdan Lazioya transfer olunmuşdu. İtalyan əfsanəsi Giuseppe Meazza tərəfindən tövsiyə olunan Gülesin, daha sonra Galatasaray formasını da geyinmiş və karyerasını burada tamamlamışdı. O, 32 birbaşa künc zərbəsi qolu ilə bu sahədə dünya rekorduna sahibdir.
Lazio forması geyinmiş digər məşhur adlardan biri isə “Sinyor” ləqəbli Fenerbahçə əfsanəsi Can Bartu olmuşdu.
Lazio, Fenerbahçəyə uduzmuşdu
Lazio, yeni mövsüm hazırlıqları çərçivəsində Fenerbahçə ilə də qarşılaşıb. 12 ildən sonra ilk dəfə baş tutan bu oyunda İtaliya təmsilçisi 1:0 hesabı ilə məğlub olub. Oyunun yeganə qolunu İrfan Can Kahveci vurub.