BAKI, AzerVoice, Nailə Babazadə
Fənərbaxça İdman Klubunun fövqəladə seçkili ümumi qurultayının ilk günü başlayıb. Klubun hazırkı prezidenti Ali Koç dördüncü dəfə bu vəzifəyə namizəd olub. Onun əsas rəqibi iş adamı Sadettin Saran isə seçkilərdə qalib gəldiyi halda, klubun 38-ci prezidenti olacaq.
AzerVoice xəbər verir ki, Ali Koç Fənərbaxçada ilk dəfə 2-3 iyun 2018-ci ildə keçirilən ümumi qurultayda prezident seçilmişdi. O vaxt klubda 20 il rəhbərlik edən Aziz Yıldırımı böyük səs fərqi ilə məğlub etmişdi. Həmin tarixdən bəri Koç üç qurultayda da vəzifəsini qoruyub saxlayıb.
Ali Koç 2021-ci il seçkilərində tək namizəd kimi iştirak etmişdi. 2024-cü ildə isə yenidən Aziz Yıldırımla rəqabət apararaq qalib gəlmişdi. Bu dəfə isə o, ilk dəfə olaraq fövqəladə qurultay keçirərək etimad səsinə ehtiyac duyduğunu bəyan edib.
Namizədlər arasında yer alan Sadettin Saran seçkilərdə qalib gəldiyi təqdirdə Fənərbaxça tarixində 38-ci prezident olacaq. Qurultay bu gün və sabah olmaqla iki gün davam edəcək.