BAKI, AzerVoice

Mançester Yunayted yay transfer pəncərəsində hücum xəttini gücləndirmək məqsədilə Aston Villanın forvardı Ollie Vatkins və RB Leypsiqin sloveniya əsilli hücumçusu Benjamin Şeşko arasında seçim etməyə çalışır.

AzerVoice xəbər verir ki, klubun transfer strategiyası "bomb squad" adlandırılan və əsas heyətdən kənarda saxlanılan oyunçuların satışı ilə maliyyələşdiriləcək.

Yunayted rəhbərliyi hücum xəttinə əlavə etmək istədiyi oyunçu sayını iki namizədə endirib. Klub artıq Vulverhemptondan Mateus Kunya və Brentforddan Bryan Mbeumonu transfer etməklə heyətini möhkəmləndirib.

Vatkinsin Premier Liqadakı təcrübəsi və uyğun qiymətə transfer edilə biləcəyi ehtimalı onun namizədliyini gücləndirir. Aston Villa, yanvar ayında Arsenalın təklifinə cavab olaraq 60 milyon funt tələb etsə də, son məlumatlara görə oyunçu 40-45 milyon funt aralığında sərbəst buraxıla bilər.

Digər tərəfdən, tanınmış idman jurnalisti Fabrizio Romano bildirib ki, Mançester Yunayted artıq Şeşkonun nümayəndələri ilə əlaqə saxlayaraq ilkin təklif irəli sürüb. Bu, gənc hücumçunun İngiltərəyə transfer ehtimalını gündəmə gətirib.

Klub yeni transferlər üçün maliyyə yaratmaq məqsədilə Ceydon Sanço, Aleksandro Qarnaço, Antoni və Tayrell Malasiyadan ibarət olan və hazırda komandanın əsas məşqlərindən uzaq tutulan oyunçuları satmağa çalışır.

Xüsusilə Antoni və Qarnaçonun satışı, klubun hücum xəttinə istədiyi transferləri reallaşdırmasına şərait yarada bilər.