BAKI, AzerVoice

ABŞ-ın “İnter Mayami” klubunda çıxış edən argentinalı hücumçu Lionel Messi, Səudiyyə Ərəbistanının “Əl-Nəsr” komandasının portuqaliyalı hücumçusu Kriştiano Ronaldoya nisbətən penalti zərbələri istisna olmaqla karyerası ərzində daha çox qol vurub.

AzerVoice xəbər verir ki, MLS-in (Əsas Futbol Liqası) müntəzəm çempionatı çərçivəsində səfərdə “Nyu-York Red Bulls”a qarşı keçirilən oyunda (5:1) dubla imza atdıqdan sonra Messinin ümumi qollarının sayı 874-ə çatıb, onların 764-ü penalti olmadan vurulub. Ronaldo isə karyerası ərzində ümumilikdə 938 qol vurub, lakin bunlardan 175-i 11 metrlik cərimə zərbəsindən reallaşıb. Messi peşəkar səviyyədə ümumilikdə 1 114 oyun keçirib, Ronaldu isə 1 281 oyunda iştirak edib.

Messi son yeddi matçda altıncı dəfə dubla imza atıb. O, MLS tarixində ardıcıl beş oyunda iki qol vuran ilk futbolçu olub. Bu rekord seriyanı ötən turda “Sinsinnati” ilə səfər matçında (0:3) dayandırıb. Ümumilikdə həmin dövrdə argentinalı hücumçu 13 dəfə rəqib qapılarına yol tapıb.

Hazırda Ronaldo və Messi futbol tarixinin ən çox qol vuran iki oyunçusu olaraq ilk iki yeri bölüşürlər.