BAKI,VOA, Fərid Mikayılov

Qazaxıstan prezidentinin imzaladığı fərmana əsasən, 2026-cı ilin mart–iyun və sentyabr–dekabr aylarında ölkədə növbəti hərbi çağırış kampaniyası keçiriləcək.

VOA xəbər verir ki, martın 17-dən etibarən şəhər və rayon çağırış komissiyaları vətəndaşların hərbi xidmətə cəlb olunmasına başlayıb.

İyunun 30-dək 18–27 yaş arası 21 mindən çox vətəndaş Silahlı Qüvvələrə, Milli Qvardiyaya, Milli Təhlükəsizlik Komitəsinin Sərhəd Xidmətinə, Fövqəladə Hallar Nazirliyinə və Dövlət Mühafizə Xidmətinə göndəriləcək.

Çağırış vərəqələri vətəndaşlara SMS mesajlar və eGov portalı vasitəsilə ən azı üç gün əvvəl göndərilir. Bu bildiriş rəsmi çağırış sayılır və vətəndaşların hərbi komissarlıqlara vaxtında müraciət etməsi tələb olunur.

Qazaxıstan Müdafiə Nazirliyi “Smart hərbi komissarlıq” layihəsi çərçivəsində hərbi qeydiyyat proseslərinin rəqəmsallaşdırıldığını bildirib. Sistem vətəndaşların qeydiyyatını, təxirə salınma və azadolmaları avtomatik şəkildə idarə edir.

Rəsmi məlumata görə, 2025-ci ildə 457 mindən çox vətəndaşa təxirə salınma hüququ verilib.

Həmçinin hərbi xidmət keçən şəxslər üçün kredit tətili və ali təhsil müəssisələrinə imtahansız qəbul imkanları nəzərdə tutulub. Bildirilir ki, son illərdə minlərlə hərbçi bu imkandan istifadə edib.

Rəsmilər qeyd edir ki, çağırışa səbəbsiz gəlməyən şəxslər inzibati və ya cinayət məsuliyyəti ilə üzləşə bilər.