BAKI, AzerVoice

Qətər, İran və İsrail arasında əldə olunan atəşkəsdən sonra Qəzza zolağında münaqişənin nizamlanması üçün yaranmış imkanlardan istifadə etməyi planlaşdırır.

AzerVoice xəbər verir ki, bu barədə Qətər Baş nazirinin müşaviri və Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari "Al Jazeera" telekanalına açıqlama verib.

“Qətərin vasitəçiliyi ilə İran və İsrail arasında əldə olunmuş atəşkəs, ABŞ prezidenti Donald Tramp administrasiyası ilə aparılan işlərin nəticəsində əldə edilmiş impuls yaratdı. Biz bu impulsdan istifadə edərək HƏMAS və İsrail arasında razılaşmaya nail olmaq istəyirik” - deyə, Əl-Ənsari bildirib.

Onun sözlərinə görə, İran və İsrail arasında atəşkəs bölgədə sülhün bərqərar olunması üçün şərait yaradıb.

“Düşünürəm ki, bu haqda danışmaq hələ tezdir və qarşımızda hələ görüləsi çox iş var”, – deyə o əlavə edib.

Xatırladaq ki, iyunun 22-nə keçən gecə ABŞ, İran və İsrail arasındakı gərginliyə müdaxilə edərək İranda yerləşən üç nüvə obyektinə hücum etmişdi. Cavab olaraq, İran iyunun 23-də Dohaya yaxın yerləşən ABŞ-ın Əl-Udeyd hərbi hava bazasına raket zərbəsi endirib. Qətər Silahlı Qüvvələrinin verdiyi məlumata görə, İrandan 19 raket buraxılıb, onlardan 18-i ələ keçirilib, biri isə baza ərazisinə düşüb. Hadisə nəticəsində xəsarət alan olmayıb.

Zərbədən dərhal sonra ABŞ prezidenti Donald Tramp İsrail və İranın atəşkəs rejiminə razılaşdıqlarını açıqlayıb.

Qeyd edək ki, martın 18-də İsrail ordusu, yanvar ayında qüvvəyə minmiş atəşkəs rejimini pozaraq Qəzza zolağında hərbi əməliyyatları bərpa etmişdi. Qətər, Misir və ABŞ-ın vasitəçiliyi ilə aparılmış bir neçə danışıqlar raunduna baxmayaraq, tərəflər yeni razılaşma şərtlərində ortaq mövqe tapa bilməmişdi.

İyunun 24-də Qətərin Baş naziri və Xarici işlər naziri şeyx Məhəmməd bin Əbdürrəhman əl-Tani bildirib ki, yaxın günlərdə İsrail və HƏMAS nümayəndələri arasında Qəzza münaqişəsinin həlli ilə bağlı dolayı danışıqların keçirilməsi planlaşdırılır.