BAKI,VOA

İordaniya Xarici İşlər və Miqrantlarla İş üzrə Nazirlik İranın Türkiyə Respublikasını və Azərbaycan Respublikasını hədəf alma cəhdini ən kəskin ifadələrlə pisləyib.

VOA xəbər verir ki, nazirlik İordaniyanın hər iki dövlətin suverenliyinin kobud şəkildə pozulmasını, regionun təhlükəsizliyi və sabitliyi üçün ciddi təhlükə yaradan bu hücumları rədd etdiyini və tənqid etdiyini vurğulayıb.

Nazirlik yaydığı bəyanatda İordaniyanın qardaş Türkiyə Respublikası və Azərbaycan Respublikası ilə mütləq həmrəyliyini, habelə suverenliklərini, təhlükəsizliklərini və vətəndaşlarının amandarlığını qorumaq üçün atdıqları bütün addımlarda onların yanında olduğunu təsdiqləyib.

Qeyd edək ki, martın 5-də Naxçıvan Beynəlxalq Hava Limanına dron hücumu olub. İran ərazisindən uçan dron aeroportun binasına və Babək rayon Şəkərabad kənd tam orta məktəbin yaxınlığına düşərək partlayıb.

Hadisə nəticəsində 4 mülki şəxs xəsarət alıb. Azərbaycan Xarici İşlər Nazirliyinin hadisə ilə bağlı bəyanat yayaraq İran İslam Respublikası tərəfindən qısa müddət ərzində qeyd olunan məsələyə aydınlıq gətirilməsini, buna izahat verməsini və bu kimi halların gələcəkdə təkrarlanmaması üçün zəruri təxirəsalınmaz tədbirlər görməyi tələb edib.

İran İslam Respublikasının Azərbaycan Respublikasındakı fövqəladə və səlahiyyətli səfiri Müctəba Dərmiçilu Xarici İşlər Nazirliyinə çağırılıb. İran tərəfinə kəskin etiraz bildirilib.