BAKI,VOA,Yusif Şərifzadə

Hörmüz boğazında gərginliyə baxmayaraq, daha çox ticarət gəmisinin hərəkətə başladığı bildirilir. Mütəxəssislərin sözlərinə görə, gəmi sahibləri marşrutdan istifadə ilə bağlı tədricən daha çox inam nümayiş etdirirlər.

VOA xəbər verir ki, dəniz risklərinin idarə olunması sahəsində fəaliyyət göstərən şirkətin rəhbəri Dimitris Maniatis bildirib ki, son günlər Hörmüz boğazından keçən və avtomatik tanınma sistemini aktiv saxlayan gəmilərin sayı artıb.

Onun sözlərinə görə, bu vəziyyət gəmi operatorlarının boğazdan keçidə əvvəlkindən daha çox etibar etməyə başladıqlarını göstərir.

Bununla belə, Maniatis qeyd edib ki, boğazın mərkəzi hissəsində dəniz minalarının olub-olmaması ilə bağlı qeyri-müəyyənlik hələ də qalır. O bildirib ki, minaların yerləşdirilməsini təsdiqləyən kifayət qədər sübut yoxdur, lakin gəmiçilik şirkətləri ehtiyatlı davranmağa davam edirlər.

Mütəxəssis vurğulayıb ki, iri ticarət gəmilərinin hərəkət istiqamətini qısa müddətdə dəyişməsi olduqca çətindir. Buna görə də onlar təhlükəli hesab edilən ərazilərdən yayınaraq alternativ marşrutlardan istifadə edirlər.

Onun sözlərinə görə, gəmilər əsasən iki istiqamətə üstünlük verirlər: ABŞ-nin müşayiəti ilə cənub dəhlizinə və ya İranın ərazi sularından keçən, İran rəsmiləri ilə əlaqələndirilən şimal marşrutuna.