BAKI,VOA,Yusif Şərifzadə

İsrailin sabiq Baş naziri Naftali Bennet bildirib ki, İsrail ABŞ və İran arasında əldə olunan razılaşmanı qəbul etməyə də bilərdi və lazım gəldikdə ABŞ Prezidenti Donald Trampa "yox" demək mümkündür.

VOA xəbər verir ki, Bennet bu fikirləri İsrailin "Maariv" qəzetinə bağlı 103FM radiosuna müsahibəsində səsləndirib.

Sabiq baş nazir Baş nazir Benyamin Netanyahunu tənqid edərək İranla son müharibənin "çox ağır uğursuzluqla nəticələndiyini" deyib.

Onun sözlərinə görə, İran nüvə proqramını davam etdirir, ballistik raket proqramını inkişaf etdirir və ölkədə mövcud hakimiyyət də yerində qalır.

Naftali Bennetdən soruşulub ki, əgər hazırda baş nazir olsaydı, Donald Trampın hər hansı tələbini rədd edə bilərdimi.

O cavabında bildirib ki, əvvəllər də ABŞ-nin keçmiş prezidenti Co Baydenə "yox" deyib.

Bennet qeyd edib ki, Benyamin Netanyahunun əvvəlki hakimiyyət dövrünün sonlarında Co Bayden Şərqi Qüdsdə fələstinlilər üçün ABŞ konsulluğunun açılmasına təzyiq göstərib və Netanyahu ilkin mərhələdə buna razılıq verib.

Sabiq baş nazir bildirib ki, vəzifəyə gəldikdən sonra bu təşəbbüsü qəbul etməyib.

"Co Bayden mənə dedi ki, konsulluq açmaq istəyir. Mən isə cavab verdim ki, Qüds yalnız bir dövlətin – İsrailin paytaxtıdır və mən bu təklifi yalnız rədd edə bilərəm", - deyə Bennet vurğulayıb.

O əlavə edib ki, dövlət maraqları tələb etdikdə ABŞ-yə də "xeyr" demək mümkündür.

Qeyd edək ki, iyunun 18-də ABŞ Prezidenti Donald Tramp və İran Prezidenti Məsud Pezeşkian "İslamabad Anlaşma Memorandumu"nu elektron qaydada imzalayıblar. Sənədin ABŞ və İsrailin fevralın 28-də İrana qarşı başladığı müharibənin dayandırılması istiqamətində əsas yaratdığı bildirilir.

Pakistan Xarici İşlər Nazirliyinin məlumatına görə, memorandumun imzalanmasının davamı olaraq ABŞ və İran nümayəndələri bazar günü İsveçrənin Bürqenştok bölgəsində texniki səviyyəli danışıqlar keçirəcəklər.