BAKI,VOA, Fərid Mikayılov

Müdafiə texnologiyaları sahəsində yeni mərhələ hesab olunan innovativ sınaq uğurla həyata keçirilib.

VOA xəbər verir ki, ABŞ-da ilk dəfə olaraq pilotsuz uçuş aparatı uçuş zamanı lazer əsaslı simsiz enerji ötürülməsi vasitəsilə şarj edilib.

Məlumata görə, Kraus Hamdani Aerospace və PowerLight Technologies şirkətləri tərəfindən həyata keçirilən test zamanı K1000ULE tipli pilotsuz uçuş aparatı xüsusi enerji ötürmə sistemi ilə havada fasiləsiz fəaliyyət göstərib. Sınaq ABŞ Mərkəzi Komandanlığının dəstəyi ilə təşkil olunub.

Bildirilib ki, lazer əsaslı sistem uçuş zamanı təxminən 1 kilovat güc ötürərək pilotsuz aparatın kəşfiyyat, müşahidə və rabitə funksiyalarını dayanmadan yerinə yetirməsinə imkan yaradıb. Bu texnologiya sayəsində aparat eniş etmədən uzun müddət havada qala bilir.

Qeyd olunub ki, ənənəvi pilotsuz uçuş aparatlarının fəaliyyət müddəti əsasən yanacaq və ya batareya imkanları ilə məhdudlaşır. Yeni texnologiya isə bu məhdudiyyəti aradan qaldıraraq daha uzunmüddətli əməliyyatlara şərait yaradır.

Mütəxəssislər bildirir ki, bu inkişaf gələcəkdə hərbi və mülki sahələrdə geniş tətbiq oluna bilər və xüsusilə infrastrukturun məhdud olduğu ərazilərdə fasiləsiz əməliyyatların aparılmasına imkan verəcək.