BAKI,VOA, Nailə Babazadə

Pakistanın Hayber Pahtunhva əyalətinin Bannu bölgəsində polis məntəqəsi partlayıcı yüklü avtomobillə hədəf alınıb.

VOA xəbər verir ki, terror aktı nəticəsində azı 5 nəfər həyatını itirib, biri polis olmaqla 13 nəfər isə müxtəlif dərəcəli bədən xəsarətləri alıb. Hücumun gücü nəticəsində polis məntəqəsi və ətrafdakı binalar ciddi ziyan görüb, ərazidə dağıntılar yaranıb.

"Dawn" qəzetinin yaydığı məlumata görə, həlak olanlardan 4-ü eyni ailənin üzvləridir. Yaralılar dərhal yaxınlıqdakı xəstəxanalara təxliyə edilib, onlardan bəzilərinin vəziyyətinin ağır olduğu bildirilir. Xilasetmə qrupları dağıntılar altında qalanların ola biləcəyi ehtimalı ilə ərazidə axtarış-xilasetmə işlərini davam etdirirlər.

Bannu bölgəsi son illərdə silahlı qruplaşmaların polis və təhlükəsizlik qüvvələrinə qarşı mütəmadi hücumlar təşkil etdiyi gərgin ərazilərdən biri hesab olunur. Yerli rəsmilər hücumla bağlı genişmiqyaslı araşdırmalara başlayıblar. Hadisənin məsuliyyətini hələlik heç bir qruplaşma üzərinə götürməsə də, regionda fəaliyyət göstərən radikal qrupların bu növ aktlarda iştirakı ehtimal edilir.