BAKI,VOA, Nailə Babazadə

İsrail cümə günü Tehrana intensiv hava zərbələri endirib. Bu müharibə qlobal iqtisadiyyatda ciddi sarsıntılara yol açıb və İranın ərəb qonşularını birbaşa münaqişəyə sürükləmək riski yaradıb.

VOA xəbər verir ki, fəallar paytaxt Tehran ətrafında partlayış səslərinin eşidildiyini bildirirlər. Bu hücumlar İsrailin İranın mühüm qaz yataqlarına zərbələri dayandırmaq vədinə baxmayaraq baş tutub. Digər tərəfdən isə İran Körfəz ətrafındakı neft və təbii qaz obyektlərinə hücumlarını intensivləşdirib.

İranın İsrailə qarşı başlatdığı hücum dalğası milyonlarla insanı sığınacaqlara göndərib; ölkənin şimalında – Heyfadan Qalileyə və Livan sərhədinə qədər geniş ərazidə həyəcan siqnalları səslənib. İsrail ordusunun məlumatına görə, təkcə cümə axşamı günü 12-dən çox raket buraxılışı qeydə alınıb.

Dünya neftinin beşdə birinin daşındığı strateji Hörmüz boğazının İran tərəfindən nəzarətə götürülməsi qlobal yanacaq tədarükünə ağır təzyiq göstərir.

İsrailin Baş naziri Benyamin Netanyahu cümə axşamı gecə saatlarında bildirib ki, Prezident Donald Trampın xahişi ilə İsrail İranın dənizdəki "Cənub Pars" qaz yatağına hücumları dayandıracaq. İranın cavab zərbələri enerji qiymətlərinin kəskin artmasına səbəb olub və Körfəz müttəfiqlərini Trampa müraciət edərək Netanyahunu cilovlamağa çağırmağa məcbur edib.

Netanyahu xarici jurnalistlərə açıqlamasında İran hərbi gücünün ağır zərbə aldığını vurğulayıb: "İranın hava hücumundan müdafiə sistemləri yararsız hala düşüb, hərbi donanması dənizin dibindədir, hərbi hava qüvvələri isə demək olar ki, tamamilə məhv edilib".